Çmimet e pronave në Shqipëri dhe Ballkan, sa dallojnë

Gjatë dekadës së fundit, rritja e çmimeve ka qenë e fortë, sipas studimit

Sipas studimit të Investropa që nga fillimi i vitit 2026, tregu i pasurive të paluajtshme në Shqipëri po shfaq një nivel më të lartë paqëndrueshmërie krahasuar me tregje më të konsoliduara si Greqia dhe Kroacia, por të ngjashëm me vende në zhvillim si Mali i Zi dhe Maqedonia e Veriut.

Madhësia relativisht e vogël e tregut shqiptar e bën atë më të ndjeshëm ndaj luhatjeve në investimet e huaja dhe flukset turistike, faktorë që ndikojnë drejtpërdrejt në kërkesë dhe çmime.

Gjatë dekadës së fundit, rritja e çmimeve ka qenë e fortë. Në Tiranë, apartamentet janë rritur nga rreth 800–1,000 euro për metër katror në vitin 2015 në 2,300–2,700 euro për metër katror në vitin 2025, duke trefishuar vlerën në një dekadë. Në krahasim, tregje më të pjekura si bregdeti i Kroacisë kanë regjistruar rritje më të qëndrueshme, rreth 40%–60% në të njëjtën periudhë. Nga ana tjetër çmimet e pronave në Greqi u rritën me rreth 7% në të gjithë vendin gjatë 12 muajve të fundit që përfunduan në janar 2026, duke vazhduar trendin rritës që ka karakterizuar tregun grek që nga viti 2018. Çmimet e pronave në Mal të Zi gjithashtu u rritën me afërsisht 20% gjatë 12 muajve të fundit, bazuar në statistikat zyrtare që krahasojnë tremujorin e tretë të vitit 2024 me tremujorin e tretë të vitit 2025, shkruan Scan, transmeton albinfo.ch.

Analizat e bazuara në të dhënat e BIS, Eurostat dhe Raportin e Stabilitetit Financiar të Bankës së Shqipërisë tregojnë se Shqipëria ka përjetuar luhatje më të theksuara ciklike.

Megjithatë, tregu ka dëshmuar një rezistencë të moderuar gjatë krizave. Në periudhën e krizës financiare globale 2008-2012, çmimet ranë rreth 10%–20% në terma nominalë dhe iu deshën 5–7 vite për t’u rikthyer në nivelet para krizës.

Historikisht, zonat që kanë ruajtur më mirë vlerën gjatë rënieve kanë qenë apartamentet në qendër të Tiranës, veçanërisht në zona si Blloku dhe pranë Sheshit Skënderbej, si edhe pronat buzë detit në Sarandë. Këto zona përfitojnë nga kërkesa e vazhdueshme si nga blerës vendas, ashtu edhe nga investitorë të huaj, duke i bërë më elastike në kohë pasigurie ekonomike.

---