De Maiziere: Refugjatëve sirianë nuk u ndalohet bashkimi familjar

Megjithatë ai ka pranuar se në fillim të javës një gjë e tllë ishte shqyrtuar dhe parashikuar

Keystone

Ministri i brendshëm gjerman Thomas de Maiziere ka përgënjeshtruar një lajm që ka qarkulluar në medie sipas të cilit refugjatëve të luftës nga Siria do t`u ndalohet bashkimi familjar dhe do t`u bëhen edhe kufizime tjera.

“Nuk ka ndryshime në praktikën e pranimit të refugjatëve sirianë”, ka thënë Maiziere në Berlin, shkruajnë mediet gjermane dhe transmeton albinfo.ch.

Megjithatë ai ka pranuar se në fillim të javës një gjë e tllë ishte shqyrtuar dhe parashikuar. “Por, në dritën e marrëveshjes më të re të koalicionit, (që është arritur të enjten), sa i përket bashkimit familjar ka nevojë të bisedohet edhe më tutje në nivel të koalicioni. Dhe për këtë arsye bashkimi familjar mbetet të vazhdojë me të vjetrën, deri në një vendim të ri”, ka thënë ai pa dhënë detajet e ndryshimeve që ishin planifikuar në këtë pikë.

Të premten, medie të ndryshme gjermane, në mesin e të cilave edhe gazeta prestigjioze “Frankfurter Allgemeine Zeitung” kishin sjellë lajmin sipas të cilit refugjatëve sirianë të luftës do t`u mohohet mundësia e bashkimit familjar dhe lehtësi tjera që u kanë takuar deri tash si refugjatë.