De Niro dëshiron ta xhirojë filmin e ardhshëm në Mal të Zi

"Me shumë qejf do ta xhiroja këtu filmin tim të ardhshëm, në rast se më ofrohen kushtet e mira”, thuhet të ketë thënë De Niro gjatë takimit me kryeministrin malazias, Dushko Markoviq

Aktori i famshëm amerikan, Robert de Niro, është shprehur i gatshëm ta xhirojë filmin e tij të radhës në Mal të Zi, pasi ka thënë se është mahnitur nga bukuritë e këtij shteti të vogël ballkanik, ku mbërriti të premten për të marrë pjesë në forumin “Global Citizen Forum”, në parkun e Miloçerit, afër Shën Stefanit.

“Me shumë qejf do ta xhiroja këtu filmin tim të ardhshëm, në rast se më ofrohen kushtet e mira”, thuhet të ketë thënë De Niro gjatë takimit me kryeministrin malazias, Dushko Markoviq, në postimin e Qeverisë së Podgoricës në Twitter.

Mali i Zi është sivjet nikoqiri i forumit të katërt të “Global Citizen Forum”, i cili mbledh liderë botërorë, pjesëtarë të familjeve mbretërore, filantropë dhe personalitete të shquara. Temë diskutimi e forumit të sivjetmë, të mbajtur më 19 dhe 20 tetor, nën patronazhin e kryeministrit Markoviq, ishte “Mundësitë në një epokë paqartësish”.