Demhasaj: Nuk hezitova t’i bashkohem Kosovës

Kosova ka ftuar gjashtë futbollistë të cilët luajnë në Super Ligën e Zvicrës

Kosova ka filluar përgatitjet për dy ndeshjet në Ligën e Kombeve, fillimisht ndaj Maltës dhe më pas ndaj Azerbajxhanit në Prishtinë.

Një nga futbollistët që është ftuar për herë të parë është Shkëlqim Demhasaj, i cili luan në Luzern të Zvicrës.

Kosova ka ftuar gjashtë futbollistë të cilët luajnë në Super Ligën e Zvicrës, përcjell albinfo.ch.

Për herë të parë janë grumbulluar, mbrojtësi i Zürichut, Mirlind Kryeziu dhe sulmuesi i Luzernit, Shkëlqim Dehmasaj nga Luzerni.

Rregullisht, sidomos me ardhjen e trajnerit zviceran Bernard Challandes, nga kampionati i Zvicrës po ftohen, Idriz Voca nga Luzerni, Arbenit Xhemaili nga Neuchatal XAMAX-si, Benjamin Kololli dhe Hekuran Kryeziu nga FC Zürichu.

“Nuk ka qenë aspak e vështirë për mua për të vendosur për të luajtur për Kosovën”, ka thënë Demhasaj pas stërvitjes së martë, shkruan albinfo.ch.

“Jam i lumtur që jam këtu. Kam luajtur më parë për Zvicrën, derisa tani ndihem mirë te Kosova”, shtoi tutje sulmuesi 22-vjeçar.

Për mesfushorin Valon Berisha, ndeshja ndaj Maltës, do të jetë si një finale. “Synojmë fitore, por ndeshja e parë do të jetë më e vështirë sepse luajmë jashtë, gjithmonë jashtë kemi pasur më shumë problem. Mendoj se asaj ndeshje duhet t’i përkushtohemi shumë sepse është shumë më e rëndësishme sesa kur luajmë në shtëpi, pasi këtu me tifozë, me atmosferën është më lehtë ta motivosh veten”, ka deklaruar Berisha.

---