Koronavirusi: çast pas çasti

Deputetët në Parlamentin e Zvicrës do të punojnë të ndarë me xhama

Më 3 qershor tashmë ishte vendosur që sesioni parlamentar i vjeshtës  do të mbahej përsëri në ndërtesën e parlamentit dhe jo në sallën e Bernexpo

Për sesionin e vjeshtës, sallat e të dy dhomave të Parlamentit Federal, do të pajisen me ndarjen prej pleksiglasi. Ato do të instalohen në sallat ku mbahen seancat dhe në dhomat e komisioneve, për të mbrojtur deputetët dhe të tjerët nga koronavirusi.

Kjo është njoftuar sot nga sektori administrativ i parlamentit, shkruan srf.ch.

Më 3 qershor tashmë ishte vendosur që sesioni parlamentar i vjeshtës  do të mbahej përsëri në ndërtesën e parlamentit, transmeton albinfo.ch. Pra ai nuk do të mbahet në sallat e panairit “Bernexpo” në Bernë, ku është mbajtur sesioni i jashtëzakonshëm, i majit dhe ai veror.

Anëtarët e këshillit (deputetët) do të përdorin vendet e tyre të zakonshme të punës në dhomat e parlamentit, përcjell albinfo.ch. Si masë paraprake, delegacioni administrativ vendosi të siguronte për ta ndarje pleksiglase.

Ndarjet përdoren në dy dhomat e parlamentit dhe në dhomat e ndryshme të mbledhjeve në ndërtesën e parlamentit.

Në fillim të gushtit do të vendoset nëse do të pranohen përsëri në parlament lobistët nga jashtë, përcjell albinfo.ch Spektatorët do të lejohen të vijnë, por grupe më të vogla se më parë. Nuk do të ketë detyrim për vënie maskash.