Dezinformimi rus godet Wikipedian  

Përmban mbi 55 milionë artikuj në mbi 300 gjuhë të folura në mbarë botën.

Në vetëm 21 vjet Wikipedia është bërë një fenomen global, një pikë referimi për të gjithë njohuritë njerëzore që çdo muaj shënon 18 miliardë vizita dhe renditet e katërta ndër faqet më të vizituara në planet, raporton focus.it.

Prandaj nuk është për t’u habitur që në luftën e informacionit që po zhvillohet në botë, edhe para fillimit të pushtimit rus të Ukrainës ka nga ata që përpiqen të ndërhyjnë në zërat e enciklopedisë më të madhe online për të ndikuar në opinionin publik botëror.

 

Natën e 13 prillit 2022, kur kryqëzori ”Moskva”, anija kryesore ruse në Detin e Zi u godit nga raketat ukrainase kundër anijeve ”Neptun”, njoftimi në Wikipedia në lidhje me anijen u modifikua disa herë brenda pak minutash nga ata që e raportuan të mbytur dhe nga ata që e mohuan.

Presionet e Rusisë

Organi që kontrollon mediat në Rusi, ”Roskomnadzor”, ka argumentuar vazhdimisht se Wikipedia është bërë burimi i “një linjë të re sulmesh të vazhdueshme ndaj rusëve” dhe se ”artikujt e saj promovojnë një interpretim ekskluzivisht antirus të ngjarjeve”.

Një gjykatë në Moskë, siç raportohet nga agjencia e lajmeve Reuters, më 13 qershor vendosi një gjobë prej 5 milionë rubla (rreth 85 000 euro) për fondacionin Wikimedia, organizatë që mbikëqyr krijimin dhe mirëmbajtjen e Wikipedia.

Wikipedia refuzoi të heqë një sërë njoftimesh lidhur me pushtimin rus të Ukrainës, masakrën e Buçës dhe krimet ruse të luftës të kryera gjatë luftës.

Organizata kundërshtoi duke deklaruar se Wikipedia është një burim i lexuar në gjithë botën, jo vetëm në Rusi, dhe duke argumentuar se publiku ka të drejtë të dijë faktet rreth luftës, të cilën Kremlini e quan një operacion special ushtarak.

 

---