Dhuna ndaj grave në Kosovë, me pasoja fatale

Në kuadër të 16 Ditëve të Aktivizimit kundër dhunës në baza gjinore, Grupi i Grave Deputete ka zhvilluar aktivitete në funksion të ndërgjegjësimit dhe të nxitjes së veprimeve për t’i dhënë fund dhunës ndaj grave dhe vajzave

Deputetja e PDK-së, Blerta Deliu Kodra, ka kërkuar nga institucionet e Kosovës të ndërmarrin masa kundër dhunës ndaj gruas. Ajo ka ngritur shqetësimin nga foltorja e Kuvendit se kjo dukuri është përshkallëzuar dhe ka tendencë të rritjes. Ka përmendur rastin e fundit ku Sevdije Berisha nga Peja ndërroi jetë si pasojë e plagëve të marra me sëpatë nga burri i saj.

Në kuadër të 16 Ditëve të Aktivizimit kundër dhunës në baza gjinore, Grupi i Grave Deputete ka zhvilluar aktivitete në funksion të ndërgjegjësimit dhe të nxitjes së veprimeve për t’i dhënë fund dhunës ndaj grave dhe vajzave.

Drejtoresha ekzekutive e Qendrës Kosovare për Rehabilitimin e të Mbijetuarave të Torturës, Feride Rushiti, ka thënë se rastet e shpeshta të dhunës ndaj grave kanë përfunduar disa herë edhe me fatalitet, dhe për këtë ajo kërkon të merren masa për parandalimin e kësaj dukurie.

Shefja e BE-së, Natalya Apostolova, ka theksuar se Bashkimi Evropian ka një të arritur të lartë për vlerat që kanë të bëjnë për të drejtat e grave. Ajo ka përgëzuar Qeverinë e Kosovës për ndarjen e mjeteve për këtë kategori.