Medalje presidenciale për prof.dr. Nazmi Maliqin: Një jetë e përkushtuar për Kosovën

Një nga figurat e angazhuara në proceset kyçe politike të Kosovës, Prof. Dr. Nazmi Maliqi, është dekoruar ditë më parë me Medaljen Presidenciale të Meritave (post mortem) nga Presidentja e Republikës së Kosovës, Vjosa Osmani Sadriu, në vlerësim të kontributit të tij të gjatë në shërbim të vendit.

Ky vlerësim i lartë institucional vjen si njohje për angazhimin e tij shumëvjeçar në jetën publike dhe politike, ku ai është shquar si një ndër figurat e përkushtuara në procese të rëndësishme për Kosovën, shkruan albinfo.ch.

Gjatë viteve 1994–1998, Maliqi ka qenë deputet në Maqedoni dhe njëkohësisht i angazhuar në arenën ndërkombëtare, përfshirë përfaqësimin në Ansamblen e NATO-s, duke kontribuar në ndërkombëtarizimin e çështjes së Kosovës.

Ai ishte gjithashtu bashkëpunëtor i afërt i ish-Presidentit Ibrahim Rugova, duke qenë pjesë e përpjekjeve institucionale dhe politike në periudha kyçe për vendin.

Medalja Presidenciale e Meritave është një nga dekoratat më të larta shtetërore dhe u ndahet personaliteteve që kanë dhënë kontribut të veçantë për shtetin dhe shoqërinë.

Ky nderim rikonfirmon rolin dhe rëndësinë e figurave që kanë kontribuar në rrugëtimin e Kosovës drejt forcimit të shtetësisë dhe zhvillimit demokratik.

Prof. Dr. Nazmi Maliqi ndërroi jetë në vitin 2023, në moshën 66-vjeçare.