Kryeministri Haradinaj: “Kosovën ta bëjmë si Gjermania”

Kryeministri i Kosovës, Ramush Haradinaj, ka thënë se nuk dëshiron që të rinjtë e Kosovës të shkojnë në Gjermani e Austri për një jetë më të mirë, por që Kosovën ta bëjnë si këto dy vende.

Haradinaj mori pjesë në shënimin e 14-vjetorit të themelimit të gjimnazit “Loyola” në Prizren, ku tha se Kosova është Evropë, veçse i mungon lëvizja e lirë, e cila do të bëhet.

Kryeministri i vendit, gjatë fjalimit të tij në shënimin e 14-vjetorit të gjimnazit “Loyola”, tha se nxënësit aty e kalojnë 100% testin e maturës, e kjo tregon sa të mirë janë ata.

Sipas tij, nxënësit e këtij gjimnazi janë të aftë të konkurrojnë edhe në tregjet jashtë Kosovës, shkruan rtk, përcjell albinfo.ch.

“Ne jemi Evropë, Kosova është Evropë, na mungon lëvizja e lirë, por edhe ajo do të vijë, por edhe lëvizja e lirë dhe mundësitë e lëvizjes lirshëm janë mundësi për të parë se çka ndodh në vendin tonë, e çka ndodh në vendet e tjera, por ne duhet të synojmë ta bëjmë jetën këtu, që rinia jonë të fokusohet, të vazhdojë brez pas brezi ta zhvillojë Kosovën. Dëshira jonë është ta bëjmë Kosovën Gjermani e Austri, e jo të rinjtë tanë të shkojnë atje”, tha ai.

Ndërsa Arfons Stendrup, anëtar i bordit të ALG, tha se do të vazhdojnë t’u ofrojnë nxënësve një shkollim të mirë.