Dy të vdekur nga stuhia në Itali

Dy gra kanë humbur jetën në Itali pas stuhisë së madhe në veri të shtetit.

“Me pikëllim të madh mësova lajmin tragjik të dy aksidenteve të shkaktuara nga moti i keq, ku një vajzë 16-vjeçare mbeti e vrarë në një kamp skautizmi në veri të Brescias dhe një grua në Lissone, në veri të Italisë, nga rrëzimi i pemëve”, shkroi kryeministrja Giorgia Meloni.

Erërat e forta, shiu i dendur dhe breshri goditën Milanon, mëngjesin e së martës, duke përmbytur rrugët dhe duke shkulur pemë, shumë prej të cilave ranë në rrugë.

Përveç stuhive, Italia në jug po përballet me një valë të nxehtit ku temperatura ka arritur në 47,6 gradë celsius e regjistruar të hënën në Catania të Sicilisë, sipas Mbrojtjes Civile lokale, përcjell albinfo.ch.