Emigracioni kërcënon koalicionin qeverisës në Gjermani

Kriza e emigrantëve dhe mënyra e menaxhimit të saj, po kërcënon edhe koalicionin qeverisës CSU-CDu në Gjermani. Kjo pasi së fundi është regjistruar nëj përçarje e madhe mes kancelares Angela Merkel e CDU-së dhe ministrit të brendshëm gjerman, Horst Seehofer, i cili është nga partia CSU.

Kjo pasi ministri i qeverisë gjermane ka kërkuar që policia të ketë fuqinë për të larguar në kufij emigrantët pa dokumente, gjë që nuk pranohet nga Merkel, shkruan “TCH”.

Kancelarja gjermane u kritikua shumë në 2015-ën për lejimin e rreth një milion emigrantëve, ndërsa tani kërkon një zgjidhje në rangun e Bashkimit Europian, për menaxhimin e kësaj çështjeje, përcjell albinfo.ch.

Seehofer ka qenë vazhdimisht kritik me politikën e dyerve të hapura të Merkelit, që përmblidhej me frazën “Ne mund t’ia dalim”, ndërsa thotë se policia kufitare gjermane duhet të kthejë mbrapsht të gjithë azilkërkuesit që nuk kanë ID dhe ata që tashmë janë të regjistruar në një vend tjetër të BE.

Nga ana tjetër, Merkel e shikon këtë politikë si shkatërruese për Italinë dhe Greqinë, vende ku aftësia për të pranuar emigrantë është në limite tashmë.

Ndërsa deputetët e CDU të Merkelit i dhanë mbështetjen e tyre të enjten, kolegët e tyre bavarezë nga CSU mbështetën me vendosmëri udhëheqësin e tyre, Z. Seehofer. Partitë konservatore kanë qenë në aleancë në nivel federal që nga viti 1949, ndërsa tani ekziston rreziku që CSU të dalë nga koalicioni, ose të kërkojë votëbesim për kancelaren Merkel.

Aktualisht në Bundestagun me 709 anëtarë, koalicioni qeverisës ka 399 deputetë, të ndarë mes CDU-së, që ka 200 deputetë, CSU 46 dhe SPD 153. Nëse CDU vendos të dalë nga koalicioni, atëherë CDU dhe SPD do të mbeten me 353 deputetë, praktikisht më pak se gjysma e anëtarëve të Bundestagut.