Ermina Përlaskaj, për herë të dytë, kandidate për Parlamentin e Kroacisë

Shqiptarja nga Kosova, Ermina Lekaj Përlaskaj, ka kandiduar në zgjedhjet parlamentare në Kroaci që do të mbahen më 8 nëntor.

Ermina Lekaj Përlaskaj garon për herë të dytë. Katër vjet më parë ajo ishte shumë afër fitores, por nuk arriti të fitojë ulësen e deputetes për një numër të vogël të votive.

Ermina vjen nga Kosova, ndërsa është shkolluar në Rijekë. Është juriste e diplomuar, si dhe ka të dhënë provimin e jurisprudencës. Aktualisht është duke vijuar studimet pasuniversitare në Menaxhim të Marketingut.

Falë përgatitjes profesionale, ajo punon si konsulente për prokurim publik, ndërsa nga viti 2000 është e punësuar si drejtoreshë për çështje juridike – ligjore, publike dhe kadrovike në Ujësjellësin Zhrnovnica d.o.o., në Novi Vinodolski.

Falë punës dhe angazhimit të saj, Ermina vendosi të kandidojë për ulësen e deputetes në zonën elektorale XII, si kandidate e pavarur për pjesëtarët e minoriteteve kombëtare shqiptare, boshnjake, malazeze, maqedonase dhe sllovene.

Kandidatja Ermina Lekaj Përlaskaj garon nën moton “Dil voto, vendos për veten”.

Ajo u premton zgjedhësve, sidomos atyre shqiptarë në Kroaci, se nuk do të zhgënjehen nëse votojnë për të.

“Duke konsideruar faktin ligjor se edhe shqiptarët kanë aftësinë për përfaqësim në organin më të lartë ligjvënës të Republikës së Kroacisë, është shumë e rëndësishme për të rritur ndërgjegjësimin dhe për të thyer paragjykimet mbi pakicat kombëtare”, thotë Përlaskaj.