Euro bie sërish në nivel rekord kundrejt frangut zviceran

Monedha evropiane vazhdon dobësimin ndaj frangut, ndërsa 1 euro këmbehet me rreth 0.91 CHF

Euro ka pësuar sërish rënie kundrejt frangut zviceran, duke arritur një tjetër nivel rekord në tregun valutor, shkruan albinfo.ch.

Sipas kursit të fundit të këmbimit, 1 euro po këmbehet me rreth 0.9146 franga zvicerane (CHF), çka tregon forcimin e vazhdueshëm të monedhës zvicerane ndaj euros.

Ndërkohë, kursi i këmbimit kundrejt dollarit amerikan është rreth 1 euro = 1.1621 dollarë amerikanë (USD).

Frangu zviceran konsiderohet prej kohësh si një nga monedhat më të sigurta dhe më stabile në botë, sidomos në periudha pasigurie ekonomike dhe tensioni në tregjet ndërkombëtare. Forcimi i tij shpesh lidhet me besimin e investitorëve në ekonominë dhe sistemin financiar të Zvicrës.

Ekspertët financiarë vlerësojnë se lëvizjet e fundit në kursin e këmbimit mund të ndikojnë në eksportet, turizmin dhe kostot e jetesës, veçanërisht për qytetarët evropianë që jetojnë apo punojnë në Zvicër./Albinfo.ch

---