Euroskeptikët: Karton të kuq për Merkelin

Protesta kundër politikës së emigracionit të qeverisë së kancelares Angela Merkel ishte organizuar nga euroskeptikët e partisë Alternativa për Gjermani (AfD) nën moton "Azili duhet të kufizohet "

Keystone

Rreth pesë mijë njerëz protestuan të shtunën në Berlin kundër politikës së qeverisë për dyer të hapura për qindra mijë refugjatë dhe emigrantë,  njoftoi policia në kryeqytetin gjerman.

Policia në Berlin ishte të shtunën në një gjendje të rritjes së gatishmërisë me 1100 pjeëetarë të cilët mbanin paqe dhe kanë penguar “takimet e ngushta” midis demonstruesve që protestonin kundër pritjes bujare të emigrantëve në Gjermani dhe protestuesve kundër tyre, që mblodhen 800 njerëz tjerë.

Protesta kundër politikës së emigracionit të qeverisë së kancelares Angela Merkel ishte organizuar nga euroskeptikët e partisë Alternativa për Gjermani (AfD) nën moton “Azili duhet të kufizohet “.

“Një karton i kuq për Merkel“, “Shpëtoni Gjermaninë”, „Stop Merkeli”, ishin mbishkrimet në pankartat e protestuesve

Një nga protestuesit në skenë foli kundër multikulturalizmit, të cilin pak vite më parë Merkel e kishte quajtur një projekt të dështuar, duke theksuar se Gjermania është tashmë mjaft “laramane”.

Sipas parashikimeve zyrtare, në Gjermani në vitin 2015 numri i azilkërkuesve do të arrijë mbi 800.000 njerëz. Por mediat thonë se kjo shifër është për refugjatët e regjistruar, ndërsa shifra e vërtetë është shumë më e lartë.

Sipas vlerësimeve të fundit nga institucioni për mbrojtje  e kufijve të Bashkimit Europian – Frontex në nëntë muajt e parë të këtij viti në territorin e Bashkimit Evropian kanë hyrë më shumë se 710,000 refugjatë. Komisioni Evropian vlerëson se kriza aktuale e emigracionit definitivisht është më e madhja në botë që prej Luftës së Dytë Botërore.