Evitohet aksident i rëndë, kamionit shqiptar i lirohet rimorkioja në autostradë

Mëngjesin e së martës, më 26 qershor 2018, pak para orës 07.15, vozitësi i një autotransportuesi shqiptar të veturave me rimorkio, ka qenë duke udhëtuar në autostradën zvicerane A2, në drejtim të jugut, përcjell albinfo.ch.

Për shkaqe ende të panjohura, rimorkioja e autotransportuesit të veturave është liruar në zonën Riedbrücke dhe më pas është ndalur në rrugë. Për fat të mirë, askush nuk ka pësuar lëndime. Dëmet e shkaktuara arrijnë shumën prej rreth 10.000 franga. Autostrada A2 është dashur të bllokohet përkohësisht, në drejtim të jugut.

Me këtë rast janë mobilizuar Departamenti i dëmtimit të Gotthardit, Zyra kombëtare e qarkullimit nëpër rrugë, një shërbim tërheqës privat dhe policia e Kantonit Uri.