Falsifikimi i diplomës i kushton me 10 vjet burgim

Një grua greke është dënuar me 10 vjet burgim për shkak të falsifikimit të diplomës së shkollës fillore, një vendim gjyqësor ky që ka provokuar trazira në vend.

Gruaja 53-vjeçare kishte punuar në një çerdhe publike për 15 vjet, derisa një rishikim në vitin 2014 zbuloi se ajo kishte falsifikuar një certifikatë të shkollës fillore. Një gjykatë rajonale e shpalli dënimin ndaj 53-vjeçares me akuzat për mashtrim të publikut, raporton “REL”.

“Ky vendim nuk është thjesht jonjerëzor. Është një shenjë domethënëse patogjene e sistemit kriminal gjyqësor”, deklaroi Shoqata për të Drejtat e Njeriut në Greqi, përcjell albinfo.ch.

Bazuar në aktakuzë, gruaja së cilës nuk i është bërë publik emri, ndryshoi certifikatën e shkollimit fillor për të treguar se kishte përfunduar gjashtë vjet të shkollës fillore, ndërsa ajo kishte përfunduar vetëm pesë vjet, përcjell albinfo.ch.

Dokumenti i duhej për t’u punësuar si pastruese. Deri rreth tre apo katër dekada më parë nuk ishte e pazakontë që varfëria të detyronte disa fëmijë grekë të braktisnin shkollën, veçanërisht në zonat rurale.

Një prokuror i lartë i Gjykatës Supreme do të shqyrtojë arsyetimin ligjor të gjykatës rajonale javën e ardhshme, thanë burime gjyqësore.