Regjioni i Ferizajt prin për pjesëmarrje në ISIS

Sipas autoriteteve kosovare, rreth 300 persona, përfshirë edhe gratë dhe fëmijët, kanë qenë në ISIS, kurse rajoni më infektuar konsiderohet Ferizaj me 24 xhihadistë  

Krahasuar me numrin e banorëve rezident, Kosova radhitet e katërta në botë për pjesëmarrje në luftën e ISIS në Siri e Irak. Sipas autoriteteve kosovare, kanë qenë rreth 300 persona, përfshirë edhe gratë dhe fëmijët, që i janë bashkuar ISIS-it, kurse rajoni më infektuar konsiderohet Ferizaj me 24 xhihadistë.

Njeriu që i prin eskortës kosovare në luftën ekstremiste në ISIS është Lavdrim Muhaxherit, njeri i dëshmuar për krime dhe i kërkuar nga institucionet ndërkombëtaret. Bashkë me të, siç raporton KlaniK, janë edhe 24 bashkëkombës të tij nga rajoni i Ferizajt, ku përfshihen edhe komunat, Kaçaniku, Hani i Elezit, Shtime e Shtërpcë.

Pjesëmarrja e shqiptarëve nga Kosova në luftërat e huaja përkrah grupit militant të Shtetit Islamik (ISIS), vazhdon të jetë shqetësim për institucionet e Kosovës. Sipas Qeverisë së Kosovës, deri më tash numri i shqiptarëve nga Kosova që i janë bashkuar Shtetit Islamik ka shkuar në rreth 300. Ndërsa rreth 50 veta konsiderohet se janë vrarë.

Por, siç kanë raportuar mediet kosovare, rreth 120 persona që kanë qenë në ISIS, janë kthyer në Kosovë. Sipas zëdhënësit të Policisë së Kosovës, Baki Kelani, numri i personave që besohet se kanë qenë në zonën e konfliktit që nga viti 2011 e deri më tani dhe të cilët janë kthyer në Kosovë është mbi 120.