Fermerët kërkojnë më shumë subvencione për grurin

Në Ministrinë e Bujqësisë thonë se Kosova po shënon rekorde në kultivimin e grurit, ndërsa fermerët kërkojnë më shumë subvencione

Për shkak të vegjetacionit më të hershëm dhe temperaturave të larta që po mbizotërojnë, fushata e korrje-shirjeve në Kosovë sivjet ka filluar më herët sesa vitin e kaluar.Sipas informacioneve nga zyrtarët e Ministrisë së Bujqësisë, rendimenti mesatar i prodhimtarisë së grurit sillet prej 3800 deri në 4200 kilogram për hektarë.Ndërsa Qeveria edhe këtë vit është duke e subvencionuar fushatën me 25 për qind zbritje të çmimit të naftës.Kryetari i Komisionit Ministror për fushatën e korrje-shirjeve, Isuf Cikaqi, i ka thënë Radio Kosovës se, bazuar në raportet përfundimtare që vijnë nga drejtoritë komunale, deri më tani janë korrur më se 30 për qind e sipërfaqeve me grurë, ndërsa në fushatë janë të përshirë gjithsej 1558 kombajna.Në fillim të kësaj jave në një takim të përbashkët mes përfaqësuesve të Ministrisë së Bujqësisë me drejtoritë komunale të Bujqësisë, është propozuar që çmimi fiks për kombajnat, në fushatën e korrje-shirjeve, të jetë i njëjtë me atë të vitit të kaluar dhe atë 100 euro për hektar.Ministria e Bujqësisë po e mbështet këtë vit fushatë e korrje-shirjeve me subvencione të derivateve të naftës deri në shkallën 25 për qind të çmimit aktual në treg. Përkushtimin e Qeverisë për të përkrahur bujqësinë e ka konfirmuar edhe vet kryeministri, Hashim Thaçi, i cili të martën mori pjesë në hapjen e fushatës së korrje –shirjeve në fshatin Suhadoll të komunës së Lipjanit. Kryeministri Thaçi, tha se Qeveria e Kosovës do të vazhdojë të qëndrojë afër bujqve me mbështetjen maksimale.E, ministri, Blerand Stavileci, potencoi se këtë vit Ministria e Bujqësisë i ka subvencionuar 8664 fermerë, për gjithsej 36637.13 hektarë të mbjella me grurë. Sipas tij, shuma e përgjithshme që kanë përfituar bujqit është rreth 3.6 milionë euro, dhe për këtë arsye ka pasur edhe rritje të sipërfaqeve të mbjella me kulturën e grurit.Për ministrin e Bujqësisë angazhimi i bujqve është një detyrim më i madh për institucionet, që viteve të ardhshme të kujdesen edhe më tepër për ta.