Fushata “Ruaj traditën, festo shqip!”

Një grup studentësh i programit Master i Shkencave, dega Gazetari dhe Marrëdhënie me Publikun në Universitetin e Tiranës mblodhën në një tryezë studiues si dhe artistë në kuadër të fushatës “Ruaj traditën, festo shqip!”, që synon ndërgjegjësimin e të rinjve në ruajtjen e folklorit.

Profesoresha Edlira Mali, njëkohësisht edhe këshilltarja e studentëve gjatë këtij projekti, foli për rrezikun e humbjes së trashëgimisë sonë folklorike. Studiuesit janë shprehur të shqetësuar në lidhje me vështirësinë e tejkalimit të folklorit nga brezi në brez.  “Marrim nisma të tilla, sepse kemi mundësi, e mbi të gjitha ndjejmë përgjegjësi për të ardhmen. Nuk harron shqiptari lahutën, traditën, pa ato do të ishte një diçka që ecte pa shpirt”, tha profesor Rahim Ombashi. Ndërkohë shkrimtari i njohur, Agron Tufa, u ndal në elementët e veçantë të folklorit shqiptar, të cilat i bëjnë rrënjët tona të thella dhe impresionuese për këdo që i përjeton, shkruan albinfo.ch

Etnologia dhe antropologia Armanda Hysa u shpreh se folklori i vërtetë nuk gjendet në festivalet folklorike, por tek festat familjare dhe dasmat. Po ashtu edhe studiuesja Ilirjana Kaceli përmendi edhe ngjarjet historike me rëndësi për trashëgiminë e kulturës sonë.

Fushata do të vazhdojë me një konkurs vallesh, ku ftohen të gjithë të interesuarit që të aplikojnë për të marrë pjesë. Fituesit e tri vendeve të para të konkursit do të kenë mundësi që të performojnë në një koncert madhështor me të ftuar, personalitete të artit, si dhe çmime të tjera.