Futbollistja Kosovare Asllani, nderohet me statujë në Suedi

Kosovare Asllani që luan për klubin futbollistik Linköpings FC, është nderuar me një statujë në Suedi. 

Sulmuesja e ekipit suedez ka thënë se kjo është ndër rastet e para që një femër futbolliste nderohet me një statujë në këtë shtet. 

“WOW. Jam jashtëzakonisht shumë krenare të jem ndër femrat e para futbolliste që nderohet me një statujë në Suedi”, ka shkruar futbollistja shqiptare në rrjetet sociale. 

“Me iniciativë të ‘Football Forevher’, e nisur nga Coca-Cola dhe nga Federata Suedeze e Futbollit, ne dëshirojmë të theksojmë rëndësinë e dukshmërisë në rritje për lojtare femra”, ka shkruar më tej Kosovarja. 

“Bashkë mund të krijojmë barazi gjinore në futbollin suedez. Bashkë shkruajmë historinë”, përmbylli postimin e saj Kosovare Asllani. 

Veç Asllanit, statuja u janë ngritur edhe tri futbollisteve të tjera: Caroline Seger, Hedvig Lindahl dhe Nilla Fischer. 

Skulpturat prej çimentos që janë mobile, do të dalin në turne, fillimisht brenda Suedisë, e më pas edhe në vende të tjera, ku kombëtarja suedeze, edhe ajo e meshkujve, do t’i zhvillojnë ndeshjet e Botërorit. 

Në karrierën e saj, Kosovare Asllani ka luajtur për PSG-në dhe Manchester Cityn. 

Më parë, Asllani pati thënë se “kur ishte gjashtëvjeçare, një familjar i saj i kishte thënë se futbolli nuk ishte për femra”. 

Kjo deklaratë dhe mendime të tilla, pati thënë ajo, e kanë shtyrë drejt sukseseve në karrierë. 

Kosovare Asllani ka lindur në Kristianstad të Suedisë. Babanë e ka nga Mitrovica, kurse nënën nga Gjakova. Familja e saj ka migruar në fillim të viteve ’90-a.