Gashi po jeton ëndrrën amerikane

Sulmuesi shqiptar u përzgjodh si “Lojtari i Muajit Tetor” te Colorado Rapids, duke fituar anketën e organizuar nga faqja zyrtare e klubit amerikan me tifozët

(AP Photo/David Zalubowski)

Sulmuesi i Kombëtares shqiptare, Shkëlqen Gashi, pas një fillimi paksa të vështirë, po shijon ëndrrën amerikane. Ai ka fituar edhe një çmim për të vazhduar kështu me suksese në SHBA, shkruan albinfo.ch.

Sulmuesi shqiptar u përzgjodh si “Lojtari i Muajit Tetor” te Colorado Rapids, duke fituar anketën e organizuar nga faqja zyrtare e klubit amerikan me tifozët.

Ai fitoi garën përballë dy shokëve të repartit sulmues, yllit irlandez Kevin Doyle dhe senegalezit Dominique Badji.

Kjo është hera e dytë që Shkëlzen Gashi përzgjidhet si “Lojtari i Muajit” te Rapids, pasi një vlerësim të tillë e mori edhe në shtator.

Sulmuesi i Kombëtares shqiptare ka fituar çmimin si “Lojtari i Vitit” te Colorado, ndërsa gjatë muajit gusht goli i tij ndaj Los Angeles Galaxy u vlerësua si “Goli më i Bukur” në Major Soccer League.

Aktualisht Shkëlzen Gashi është edhe në garën për “Golin më të Bukur të Vitit” në kampionatin amerikan të futbollit, për golin e realizuar ndaj Vancouver Whitecaps, me një ekzekutim mbresëlënës nga gjuajtja e lirë.

28-vjeçari është nominuar edhe për çmimin “Debutuesi i Vitit”, ku vlerësohen lojtarët që kanë spikatur prej sezonit të parë në MLS.