Kosova

Gërvalla paralajmëron shfuqizimin e të emëruarve të jashtëligjshëm në ambasada e konsullata

Të gjithë të emëruarit e jashtëligjshëm do të kthehen në Kosovë

Në një postim në rrjetet sociale, ministrja e Punëve të Jashtme dhe Diasporës, Donika Gërvalla, ka ritheksuar për shfuqizim të disa vendimeve të jashtëligjshme, që do të kthejnë ligjshmërinë dhe drejtësinë e munguar në këtë institucion, përcjell albinfo.ch.

Gërvalla ka shkruar se ka gjetur shkelje të shumta ligjore, të cilat janë bërë viteve të fundit.

Ajo tregon në statusin e saj në Facebook se Ministria që ajo udhëheq dhe vetë ajo janë përballur me shumë kritika.

Po ashtu, ajo ka shtuar se nuk ka asgjë të papritur në qasjen e atyre që po humbasin jo vetëm privilegjet dhe paratë, por që po e shohin çdo ditë e më tepër që kontrolli i tyre në vendin tonë po dobësohet dita-ditës.

E para e MPJD-së ka paralajmëruar se edhe më shumë ankesa dhe klithma do të dëgjohen gjatë javëve të ardhshme, atëherë kur në kuadër të strukturës së re të një ministrie moderne dhe efektive të Punëve të Jashtme dhe Diasporës, do të hyjë në fazën e verifikimit të kompetecës, në implementimin e plotë të kritereve profesionale dhe transparencës te të gjitha postet drejtuese brenda kësaj ministrie.

“Pas një faze shumë intensive të identifikimit jo vetëm të dobësive, por edhe potencialit për reformë brenda Ministrisë së Punëve të Jashtme dhe Diasporës, tani kemi hyrë në fazën finale të fuzionimit të ish-Ministrisë së Punëve të Jashtme dhe ish-Ministrisë së Diasporës, fuzionim ky që ka dështuar ta kompletojë qeveria gjatë mandatit të kaluar. Në kuadër të riorganizimit të MPJD-së ndodhemi në prag të implemetimit të rregullores së re të brendshme, e cila do të mundësojë një funksionim më të mirë dhe më efektiv të këtij institucioni. Ndihem shumë krenare me të gjithë ata zyrtarë të shumtë, brenda dy ministrive dhe jashtë nëpër misione diplomatike, të cilët me përkushtimin, pasionin dhe zellin e tyre, me integritet personal dhe profesionalizëm punojnë shumë çdo ditë për të forcuar pozicionin e Kosovës në skenën ndërkombëtare. Pa ta e gjithë kjo punë kolosale nuk do të kishte qenë e mundur”, ka shkruar ajo.

Gërvalla ka shtuar se stuhia e pafund e ankesave do të vazhdojë edhe në javët në vijim. Pasi, sipas saj, të gjithë ata që janë dërguar në ambasadat dhe konsullatat e Kosovës jashtë vendit në kundërshtim me ligjin ose që nuk i kanë përmbushur pritjet elementare të një diplomati, do të kthehen gradualisht në Prishtinë.

“Pas gjithë atyre viteve pa ligjshmëri, ligjin do të zbatohet përfundimisht edhe në këtë fushë. Por shteti ligjor është shtet ligjor dhe jo shtet i nepotizmit, i privilegjeve të pafundme dhe i tradhtisë ndaj taksapaguesve dhe djersës së tyre. Pra, nga cilësia e karakterit bazë njerëzor dhe profesionalizmi, nga dija dhe zelli do të varet se a do ta gëzojë dikush privilegjin ta përfaqësojë vendin tonë krenar. Zyrtarët e Kosovës në ambasada, konsullata dhe në ministri në fund të fund shef e kanë ligjin dhe sovranin, pra qytetarin e Republikës së Kosovës, atë që jeton brenda por edhe jashtë vendit. Kush nuk e kupton këtë parim bazë, kush nuk e kupton që është privilegj i jashtëzakonshëm të shërbesh, nuk meriton të shërbejë në misionet e tona diplomatike”, ka thënë ajo.

Ajo ka thënë se do të hapin konkurse të reja, të bazuara në kritere transparente profesionale për ta pasuruar MPJD-në me diplomatë të kualifikuar mirë, në mënyrë që të krijojmë një ekip profesional solid dhe premtues për të ardhmen e diplomacisë kosovare.

Gërvalla ka shtuar se dhënien e gradave do ta vendosin në binarë ligjorë, duke shpërblyer punën dhe profesionalizmin, e jo përkatësinë partiake, klanore apo familjare.

“Kemi audituar ndërkohë sektorët e ndryshëm të ministrisë dhe tani jemi në fazën e implementimit të rekomandimeve të auditorit. Auditime të tjera të rëndësishme do të vijojnë. Kështu kemi funksionalizuar zyrën e personelit, kemi ndalur shkeljet gjatë emërimeve, shpërdorimin e parasë publike dhe kontratat e tenderët e pakuptimtë. Kemi ndalur po ashtu edhe udhëtimet e panevojshme duke implementuar mekanizma rigoroze të kontrollit. A jemi perfekt në punën dhe rezultatet tona? Sigurisht që jo. Por ajo që me siguri do të vazhdojmë të bëjmë është, të vazhdojmë të punojmë fort për të arritur ristrukturimin e diplomacisë sonë dhe të MPJD-së, në mënyrë që të kemi një politikë të jashtme larg më efektive se gjatë viteve të fundit”, ka thënë ajo.

Ajo ka shtuar se të gjitha këto masa nuk ka pritur të kalojnë pa debate dhe përpjekje për ta skandalizuar vendosjen e ligjshmërisë në MPJD.

“Gjatë ditëve, javëve dhe muajve të fundit vështirë t’iu shpëtosh „lajmeve“ të ndryshme rreth „bëmave“ të Ministrisë së Punëve të Jashtme dhe Diasporës dhe sidomos ndaj meje si drejtuese e këtij institucioni. Të krijohet përshtypja sikur këta zëra dje kanë ardhur nga një planet tjetër dhe prandaj habiten me realitetin e trashëguar brenda institucioneve të Kosovës. “Shkelës të ligjit”, “anti-UÇK”, “tejmase agresivë ndaj Rusisë”, “jo mjaftueshëm konstruktivë ndaj Serbisë”, “jo të bindur sa duhet ndaj ndërkombëtarëve”, “qeveri praktikantësh” janë vetëm disa nga etiketimet. Të mos flasim për „skandalet dramatike“ në Twitter, këpucët, frizura. Shtojini këtyre edhe kërcënimet, sharjet banale, shantazhet e ulëta dhe fyerjet jo vetëm ndaj MPJD-së dhe atëherë përafërsisht mund ta shihni fushëbetejën e një strategjie për të ngadalësuar ose madje edhe ndalur përfundimisht qeverinë në reformimin e domosdoshëm të institucioneve, në luftën kundër korrupsionit, krimit të organizuar dhe hijeve të shëmtuara të së shkuarës”, ka shkruar ndër të tjera ajo.

Sipas saj, kritika ndaj qeverisë dhe veprimeve të saj, ndaj gabimeve apo dështimeve të saj është thelbësore dhe e domosdoshme për çdo demokraci të vërtetë.

Gërvalla ka shtuar se kritika e mirëfilltë, sado e ashpër apo agresive të jetë, në radhë të parë bazohet në fakte dhe në të vërtetën. Ajo ka thënë se fushatat me lajme tërësisht të rreme, në fund të fundit, më shumë sesa sulm ndaj individëve të caktuar janë sulm frontal kundër së vërtetës dhe faktit.

“Dhe nëse e vërteta në vetvete është nën sulm, atëherë beteja për mbrojtjen e saj merr një dimension të ri. Sulmet e përziera me gënjeshtra të kulluara nuk është se janë dukuri e shpikur në Kosovë. ‘Fake News’ janë kthyer në rrezik serioz, madje edhe për demokraci më të qëndrueshme dhe më të dëshmuara se e jona. Përgjegjësi e një qeverie është jo vetëm që të kujdeset për hartimin dhe zbatimin e politikave të veta. Shumë më i rëndësishëm është roli i saj si garantuese e lirisë dhe demokracisë së qytetarëve të saj. Dhe prandaj mbrojtja e vendit nga sulmi ndaj së vërtetës dhe faktit, nga jashtë apo nga brenda, është një detyrim kyç. Nuk është hera e parë që dëshmojmë vendosmërinë tonë të sprovuar në kohët më të errëta të pushtimit serb dhe në epokën e mbajtjes peng nga bandat e korruptuara dhe elitat e korruptuara politike”, ka thënë ajo.

Ajo ka thënë se një matje e efektivitetit të punës në MPJD tregon se ka shumë hapësirë për përmirësim.

Sipas saj, praktika e deritanishme e mosrespektimit të orarit i dëmton financat publike, por njëkohësisht dëmton edhe të gjithë ata kolegë në MPJD, të cilët jo rrallë punojnë jo vetëm gjatë orarit të rregullt, por edhe deri në 12 orë në ditë për të kompensuar mospunën e disave.

“Sigurisht që ata, të cilët për herë të parë pas shumë vitesh do të detyrohen ose të punojnë si gjithë të tjerët, ose të largohen, nuk janë të lumtur me ndryshimet që kanë ndodhur. Kosova dhe qeveria e saj përballen me rezistencën e atyre që ende mendojnë se nuk është privilegj të punosh për vendin tonë krenar. Por ndryshimi në Kosovë, edhe pse diku diku ende i ngadalshëm, tashmë është i pandalshëm. Gabon kush dyshon në vendosmërinë tonë për ta mundur të keqen dhe për ta ndërtuar të ardhmen duke i shërbyer Republikës sonë krenare dhe qytetarëve të saj. Për të realizuar premtimin që dhamë dhe për të cilin u zgjodhëm. Kësaj rruge i kemi hyrë së bashku dhe nuk do të lëkundemi. As qeveria dhe as qytetarët”, ka thënë ajo.


LAJME INTERESANTE NGA INTERNETI