Gjermani: Sesion informues: “Klima e investimeve në Kosovë”

Ministria e Tregtisë dhe Industrisë, përmes Agjencisë për Investime dhe Përkrahjen e Ndërmarrjeve në Kosovë (KIESA), në bashkëpunim me Ministrinë e Punëve të Jashtme, Konsullatën e Republikës së Kosovës në Mynih të Gjermanisë dhe në bashkëpunim me Bizneset e Diasporës Shqiptare në Gjermani, më 15 nëntor 2019 në Mynih organizuan Sesionin informues “Klima e investimeve në Kosovë”.

Në këtë sesion informues, ushtruesi i detyrës së Drejtorit të Përgjithshëm të KIESA-s, z. Nol Buzhala, njoftoi bizneset pjesëmarrëse të diasporës shqiptare në Gjermani rreth fushëveprimtarisë dhe shërbimeve të KIESA-s, njëherësh i falënderoi për kontributin që japin këto biznese dhe i ftoi që të investojnë në Kosovë.

Gjatë sesionit u bënë prezantime edhe nga përfaqësues të Administratës Tatimore, Agjencisë Kosovare të Privatizimit si dhe Dogana e Kosovës. Ndërsa udhëheqës i Sektorit për Promovim të Investimeve, Kreshnik Thaqi, para të pranishmëve prezantoi sektorët potencialë për investime në Kosovë.

Në këtë sesion informues morën pjese edhe 8 kompani të verërave të Kosovës, të cilat prezantuan produktet e tyre dhe ofruan gatishmëri për bashkëpunim me bizneset e diasporës. /Albinfo.ch