Gjermania kthen edhe 74 refugjatë kosovarë

Gjermania vazhdon të kthejë kosovarët, të cilëve iu është refuzuar e drejta e azilit në Gjermani. Ditën e djeshme janë kthyer edhe 74 persona të tjerë, përcjell albinfo.ch.

Sipas Ministrisë së Brendshme në Magdeburg, ditën e mërkurë në mesditë nga Leipzigu janë dërguar 74 persona për në aeroportin e Prishtinës. “Të kthyerit janë 59 kosovarë që ishin strehuar në Sachsen, 14 nga Berlini dhe një nga Hessen”, thuhet në deklaraten e ministrisë, raporton “volksstimme.de”.

Ministri i Brendshëm, Holger Stahlknecht, ka thënë se dëbimi në mënyrë kolektive është një sinjal që kosovarët nuk duhet të kërkojnë azil në Gjermani. “Me kthimin kolektiv ne po ua bëjmë të qartë kosovarëve se ata nuk kanë nevojë për azil dhe nuk mund të qëndrojnë në Gjermani. Ne duhet t’i dëbojmë për t’ua liruar vendin atyre azilkërkuesve që vijnë nga vendet, të cilët vërtet kanë nevojë  për strehim”, ka thënë ai.

Fluturimi i azilkërkueseve është bërë dje në orën 13:32 minuta. Grupi i të kthyerve ka qenë i shoqëruar nga zyrtarë policorë gjermanë, nga një mjek dhe një përkthyes.