Gjermania sot mbylli kufijtë me Zvicrën dhe katër vende të tjera

Gjermania mbylli kufijtë me Francën, Austrinë dhe Zvicrën nga mëngjesi i së hënës për të ndihmuar në ndalimin e përhapjes së koronavirusit.

Sot, Gjermania mbylli përkohësisht kufijtë e saj me Francën, Zvicrën, Austrinë, Luksemburgun dhe Danimarkën, duke rritur kështu përpjekjet për të penguar përhapjen e koronavirusit të ri, transmeton albinfo.ch.

Ministri i Brendshëm, Horst Seehofer, ka thënë se kontrollet e reja do të hyjnë në fuqi në orën 8 të mëngjesit të të hënës.

“Përhapja e koronavirusit po përparon shpejt dhe në mënyrë agresive… një nga masat më të rëndësishme do të jetë ndërprerja e zinxhirit të infeksionit”, u tha Seehofer gazetarëve, ndërsa njoftoi kontrollet e reja të kufirit.

Njerëzit që lëvizin përtej kufirit për të punuar, do të jenë ende në gjendje të kalojnë, ashtu si dhe mallrat.

Sidoqoftë, njerëzit “pa një arsye të vlefshme për të udhëtuar nuk do të lejohen të hyjnë dhe të largohen” nga Gjermania, shtoi Seehofer.

Ministri theksoi se shtetasit gjermanë në vendet fqinje do të lejohen të kthehen brenda.

Gjermania kishte konfirmuar gati 4,000 persona të infektuar me koronavirus deri të shtunën, si dhe autoritetet kanë raportuar 11 vdekje. /Albinfo.ch

---