Hamza: Zyrës së Presidentit i shtohet buxheti

Buxheti për Zyrën e Presidentit rritet për 81 mijë e 543 euro për periudhën 2017-2020. Numri i të punësuarve ishte 70, kurse me ndryshimet e bëra në ligj do të arrijë në 80 të punësuar

Ministri i Financave, Bedri Hamza, ka prezantuar para deputetëve në Komisionin parlamentar për Buxhet dhe Financa Projektligjin për ndryshimin dhe plotësimin e Ligjit për Presidentin. Ai theksoi se buxheti për Zyrën e Presidentit rritet për 81 mijë e 543 euro për periudhën 2017-2020.

Ndërsa sqaroi se numri i të punësuarve ishte 70, kurse me ndryshimet e bëra në ligj do të arrijë në 80 të punësuar.

Në këtë mbledhje është shqyrtuar edhe raporti vjetor financiar i Zyrës Kombëtare të Auditimit për vitin 2016. Komisioni i ka proceduar në Kuvend emrat e 4 kandidatëve për guvernatorë të Bankës Qendrore të Kosovës.

Kryetari i komisionit, Lumir Abdixhiku, ka bërë të ditur se emrat e 4 kandidatëve të propozuar për guvernatorë janë Fehmi Mehmeti, Shkëndije Himaj, Besnik Bislimi dhe Safet Merovci. “Qeveria ka dërguar emrat e kandidatëve dhe është deklaruar se pajtohet me emrat e kandidatëve të propozuar. Ne e procedojmë tutje këtë propozim”, ka thënë Abdixhiku.