Hashim Thaçi dorëzon edhe një herë tjetër kërkesën për vizitë urgjente te babai

Keystone (AP Photo/Jerry Lampen via AP Photo, Pool)

Ish-presidenti i Kosovës, Hashim Thaçi, e ka parashtruar një kërkesë të katërt për vizitë urgjente në Kosovë.

Dy kërkesat e tij janë aprovuar, në maj dhe shtator të vitit 2023. Kërkesa e tretë ishte ajo e 28 janarit për të ardhur urgjentisht, ndërsa më 14 shkurt, Thaçi, pas bisedave me familjarët dhe informacioneve që kishte marrë se gjendja e babait të tij ishte rënduar akoma më tepër, kishte kërkuar edhe një herë që të vijë urgjentisht në Kosovë për ta vizituar. Pavarësisht se më 14 shkurt babai i tij nuk ishte i shtrirë në spitalet e vendit, ai e kishte ripërsëritur kërkesën, transmeton albinfo.ch.

Thaçi është shprehur i gatshëm të vijë për një ditë, mirëpo, parashtresa e regjistrit që ia dërgon gjyqtares se procedurës paraprake nëse duhet t’i lejohet apo jo vizita, thotë që është e mjaftueshme video-vizita, pra video-lidhja.

Gjykata Speciale i ka refuzuar dyfish kërkesën e tretë të ish-presidentit me arsyetimin se babai i tij Haxhi Thaçi është liruar nga spitali dhe nuk ka indikacione për përkeqësim të gjendjes ndërsa prej mbrëmjes së 26 shkurtit, 86-vjeçari është shtrirë në Neurologji për shkak të problemeve shëndetësore.