Homazhet në Prekaz, nderohen Jasharajt

FB: Vjosa Osmani

Në 25 vjetorin e rënies së Familjes Jashari krerët shtetëror kanë bërë homazhe pranë kompleksit memorial “Adem Jashari” në Prekaz.

Presidentja Osmani ka shkruar se Jasharajt u bënë udhërrëfyes për çdo shqiptar. “Gjaku i tyre i njomë u bë dritë udhërrëfyese për çdo shqiptar! Lavdi përjetësisht!”, ka shkruar Osmani.

Në 25-vjetorin e rënies heroike të komandantit legjendar Adem Jashari, familjes Jashari, dëshmorëve të kombit, si dhe të gjithë të rënëve për liri, Qeveria e Kosovës më 5, 6 dhe 7 mars do të organizojë manifestimin gjithë popullor “Epopeja e Ushtrisë Çlirimtare të Kosovës”.

Homazhe pranë varreve të Jasharajve ka bërë edhe Ramush Haradinaj që tha se liria ka emrin e tyre. “Historisë së Kosovës së lirë dhe të pavarur, i dha vulë sakrifica sublime e familjes Jashari në krye me Komandantin legjendar, Adem Jashari. Ata dhanë gjithçka që ishte e tyre, për gjithçka çfarë kemi ne sot. Familja Jashari do të jetë përjetësisht e nderuar dhe frymëzimi më i madh i dashurisë për kombin”, ka thënë Haradinaj.

Në orën 12:00 në Kazermën “Adem Jashari” në Prishtinë zhvillohet ceremonia e rreshtimit të ushtarëve të Forcës së Sigurisë së Kosovës.