Hoxhaj: Taksa s’duhet të ndikojë në vendimin për liberalizim

Taksa për mallrat serbe nuk do të duhej të ndikonte në liberalizimin e vizave, thotë ministrja e Integrimit Evropian, Dhurata Hoxha.

Ajo, në një intervistë për Ekonomia Online, ka thënë se BE-ja është treguar e padrejtë ndaj Kosovës, ku ka thënë se në agjendën e publikuar për mbledhjen e Këshillit të Ministrave të BE-së për datën 6 dhjetor, Kosova nuk figuron fare që është në rend dite për çështjen e liberalizimit të vizave.

“Është me të vërtetë për keqardhje, sepse ne kemi përfunduar punët tona dhe tani i mbetet BE-së ta kryejë pjesën e vet të marrëveshjes. Marrëveshja ka qenë tërë kohën, ky proces është teknik, posa të plotësohen kriteret, ne më pastaj do t’i liberalizojmë vizat për qytetarët e Kosovës dhe tani po e vërejmë një mungesë të vullnetit politik nga shtetet anëtare që të lëvizin përpara. Ka mbetur vetëm hapi i fundit. Publikimi në gazetën zyrtare, plotësim-ndryshimi i Rregullores, të gjitha këto janë procese teknike që nëse ka vullnet politik në shtetet anëtare, shumë shpejt mund të përfundojnë”, ka thënë Hoxha.