I biri i Gadafit, i mirëseardhur në Zvicër!?

"Rasti me pengjet është zgjidhur. Nuk ka udhëzime në bazë të të cilave shtetasit libianë do të përjashtoheshin nga pjesëmarrja në forum"

Në Forumin Ekonomik Botëror që mbahet në fund të janarit në Davos të Zvicrës, janë të mirëseardhur edhe shtetasit e Libisë. Kjo, duket se është në kundërshtim me ndalesat që rrjedhin nga afera e pengjeve zvicerane të mbajtur në Libi.

Madje vetë njëri nga djemtë e diktatorit Gadafi, Seif Al-Islam gjendet në listën e të ftuarve. Kështu ka thënë për medie, zëdhënësi i Forumit të Davosit, Fon Mathuros, siç shkruan sot 20 Minuten.

„Rasti me pengjet zvicerane është zgjidhur. Nuk ka udhëzime në bazë të të cilave shtetasit libianë do të përjashtoheshin nga pjesëmarrja në forum”, ka shtuar ai.

Vetëm një vit më parë, gjendja ishte fare ndryshe. „Deri sa të mos normalizohen marrëdhëniet në mes të dy vendeve, nuk do të ketë pjesëmarrës nga Libia”, ishte pohuar atëbotë në Davos.