Identifikohen viktimat e tragjedisë në Maqedoni të Veriut, mes tyre babë e bir

Mes viktimave edhe babë e bir, ndërsa hetimet paraprake dyshojnë se kamioni kaloi në korsinë e kundërt para përplasjes fatale

Janë identifikuar viktimat e aksidentit të rëndë që ndodhi një natë më parë në qarkoren Radishan–Prishtinë–Mirkovcë, ku katër persona humbën jetën pas një përplasjeje të fuqishme mes një veture të tipit BMW dhe një kamioni me targa të Kosovës, përcjell albinfo.ch.

Sipas raportimeve të mediave shqiptare në Maqedoninë e Veriut, të konfirmuara edhe nga policia, në automjetin BMW ndodheshin katër persona, të cilët humbën jetën në vendin e ngjarjes si pasojë e aksidentit dhe zjarrit që përfshiu veturën menjëherë pas përplasjes.

Viktimat janë identifikuar si R.V. (51-vjeç) dhe A.V. (20-vjeç), babë e bir me mbiemrin Velkov, si dhe dy të rinj të tjerë, P.M. dhe M.GJ., të dy 20-vjeçarë. Automjeti BMW kishte targa të Shkupit dhe drejtohej nga R.V., transmeton Klankosova.tv.

Sipas informacioneve paraprake hetimore, drejtuesi i kamionit të tipit “MAN”, 76-vjeçari B.B. me mbiemrin Behrami, dyshohet se ka humbur kontrollin mbi automjetin me gjysmërimorkio dhe targa kosovare, duke kaluar mbi gardhin metalik ndarës dhe duke hyrë në korsinë e kundërt, ku është përplasur drejtpërdrejt me veturën BMW.

Përplasja ishte jashtëzakonisht e fortë dhe pas goditjes vetura u përfshi nga flakët, duke u djegur pothuajse tërësisht. Për shkak të dëmtimeve të mëdha dhe intensitetit të zjarrit, identifikimi i viktimave kërkoi disa orë punë nga ekipet e mjekësisë ligjore dhe hetuesit në terren.

Autoritetet po vazhdojnë ekzaminimet teknike dhe hetimet për të sqaruar plotësisht rrethanat e aksidentit tragjik. Për disa orë, qarkullimi në atë segment rrugor u zhvillua me devijime dhe masa të shtuara sigurie./Albinfo.ch

---