Italia bën thirrje për formimin e ushtrisë së Bashkimit Evropian

Ministri i Punëve të Jashtme të Italisë, Antonio Tajani ka deklaruar se Bashkimi Evropian duhet të formojë ushtrinë e vet të kombinuar që mund të luajë një rol në ruajtjen e paqes dhe parandalimin e konflikteve.

“Nëse duam të jemi paqeruajtës në botë, na duhet një ushtri evropiane. Ky është një parakusht themelor për të pasur një politikë të jashtme efektive evropiane. Në një botë me lojtarë të fuqishëm si Shtetet e Bashkuara të Amerikës, Kina, India, Rusia me kriza nga Lindja e Mesme deri në Indo-Paqësorin qytetarët italianë, gjermanë, francezë apo sllovenë mund të mbrohen vetëm nga diçka që tashmë ekziston, gjegjësisht Bashkimi Evropian”, tha ai për La Stampa.

Sipas tij, Bashkimi Evropian duhet të përmirësojë udhëheqjen dhe të ketë një presidencë të vetme, në vend të strukturës aktuale të një presidenti të Këshillit Evropian dhe një presidenti të Komisionit Evropian, përcjell albinfo.ch.