Italia i dhuron pajisje prej 370 mijë eurosh QKUK-së

Funksionalizohet salla e dytë operative për sëmundjet e zemrës.

Në Klinikën e Kardiokirurgjisë janë dhuruar nga Ambasada italiane pajisje me vlerë prej 370 mijë eurosh, të cilat mundësojnë vënien në funksion edhe të sallës së dytë operative për sëmundjet e zemrës dhe rritjen e numrit të shërbimeve. Ky donacion nga Qeveria italiane për shëndetësinë kosovare është në kuadër të projektit 3-milionësh: “Mbështetje për sistemin shëndetësor në Kosovë”.

Ministri i Shëndetësisë, Uran Ismajli, ka deklaruar se furnizimi me barna esenciale është përmirësuar, pasi që tani 70 për qind e barnave janë me kontrata. Ai ka theksuar se kanë arritur të përmirësojnë gjendjen e furnizimit e barna, si dhe të kursejnë miliona euro, duke mos blerë barna me çmime të larta, ashtu siç ka ndodhur deri tani. Drejtori i SHSKUK-së, Basri Sejdiu, ka thënë se furnizimi me stenta dhe material shpenzues është i kënaqshëm.