Ivanov i obliguar të nënshkruajë Ligjin për gjuhët

Ai mendon se pas rivotimit të ligjit me shumicën e votave të numrit të përgjithshëm të deputetëve, siç ka qenë rasti i djeshëm, Ivanov ka obligim ta firmosë Ligjin për përdorimin e gjuhëve, sepse në të kundërtën kjo do të thotë se ai i shkel dispozitat ligjore

Presidenti i Maqedonisë, Gjorge Ivanov ka obligim ta nënshkruajë dekretin në pajtim me nenin 75 të Kushtetutës së RM-së, u shpreh kryetari i Kuvendit të Maqedonisë, Talat Xhaferi.

Ai mendon se pas rivotimit të ligjit me shumicën e votave të numrit të përgjithshëm të deputetëve, siç ka qenë rasti i djeshëm, Ivanov ka obligim ta firmosë Ligjin për përdorimin e gjuhëve, sepse në të kundërtën kjo do të thotë se ai i shkel dispozitat ligjore, përcjell albinfo.ch.

“Për rivotim të ligjit nevojitet shumica e numrit të përgjithshëm të deputetëve. Në këtë rast, Ligji e kishte shumicën e nevojshme. Në fakt, Ligji edhe paraprakisht e kishte shumicën e nevojshme, sipas dispozitave të Kushtetutës, dhe tani mbetet obligim kushtetues që kjo gjë të realizohet”, deklaroi Xhaferi, raportojnë mediat shqiptare të Maqedonisë.

Ivanov tha se ligji për gjuhët është ligj i padrejtë dhe represiv, i cili do t’i thellojë edhe më shumë tensionet ndëretnike në vend. Ivanov tha se kjo është arsyeja se pse ai nuk do ta firmosë këtë dekret për shpalljen e ligjit i cili u miratua në këtë mënyrë.

Gjykatësi kushtetues, Osman Kadriu, tha se nuk do që të predikojë nëse Ligji për përdorimin e gjuhëve është sipas Kushtetutës, megjithatë tha se Ivanov duhet ta firmosë këtë dokument.

Sipas ish-kryetarit të Gjykatës Kushtetuese, Trendafil Ivanovski, ngjarjet e djeshme e njolluan imazhin e vendit për shkak se pushteti dhe opozita ushtruan dhunë ndaj Kuvendit.