Jep dorëheqje shefi i stafit të presidentes së Kosovës, Blerim Vela

Bëhet e ditur se shefi i stafit të presidentes Vjosa Osmani, Blerim Vela, ka dhënë dorëheqje nga pozita e tij, ka konfirmuar Presidenca, përcjell albinfo.ch.

Në një postim në Facebook, Presidenca ka thënë se Vela ka përfunduar angazhimin e tij për t’iu kthyer angazhimit profesional e familjar.

“Presidentja Osmani e ka falënderuar Velën për angazhimin e deritashëm dhe i ka uruar sukses në angazhimet e mëtejme”, thuhet në deklaratë.

Vela e ka konfirmuar largimin edhe përmes një postimi në twiter.

“Sot është dita ime e fundit në detyrën e Shefit të Stafit të Presidentes. Ishte nder dhe privilegj të shërbeja në Presidencë. Krenar për punën e bërë dhe përvojën e çmuar. Po i kthehem angazhimit tim profesional dhe familjes. Falënderoj kolegët në Presidencë, institucionet e Kosovës dhe partnerët ndërkombëtarë për bashkëpunimin”, ka shkruar ai.

Së fundmi, Vela ishte në qendër të kritikave pasi sugjeroi që presidenti serb, Aleksandar Vuçiq dhe publicisti Fahri Musliu duhet ta bëjnë testin e ADN-së për të vërtetuar nëse kanë gjakun e njëjtë. Vela më pas fshiu postimin në X, të njohur si Twitter.