Kantoni i Bernës korrigjon BAG-un: Lajmi për vdekjen e të riut është i rremë

Të premten BAG ka raportuar për herë të parë vdekjen e një të riu nga virusi korona. Por, në mbrëmje, kantoni i Bernës njofton se bëhet fjalë për një dezinformatë

Të premten pasdite Qeveria Federale, përmes BAG, ka konfirmuar se një i ri midis moshës 20 dhe 29 vjeç kishte vdekur nga virusi i koronës në kantonin e Bernës. Në konferencën për media të premten pasdite, BAG ka njoftuar po ashtu se, sipas njohurive aktuale, i riu nuk vuante nga sëmundje të mëparshme.

Por, vetëm pak orë më vonë, të premten në mbrëmje, kantoni i Bernës ka reaguar:  lajmi për vdekjen e pretenduar nuk qëndron, shkruajnë të gjitha mediat zvicerane, transmeton albinfo.ch.

“Kjo është dezinformatë që ka ardhur për shkak të paqartësive në raportin klinik rreth një personi që është në izolim dhe nuk ka simptoma të rënda Covid-19”.

Nuk është dërguar ndonjë raport i vdekjes në BAG nga kantoni i Bernës. BAG do të korrigjojë statistikën nesër, në orën 13.

Në fund të majit, një fëmijë pati vdekur në kantonin e Aargaut, pasi kishte ardhur me prindërit nga Maqedonia, shkruan albinfo.ch. Kjo më parë ishte testuar pozitivisht për koronavirus.

Shumica e madhe e të vdekurve nga koronavirusi në Zvicër janë më të vjetër se 80 vjet.

---