Kapen 7 shqiptarë të Kosovës në Mallorca: Kanë kryer 150 vjedhje

Ata, që të gjithë shqiptarë të Kosovës, siç shkruan gazeta ”Mallorca Zeitung”, janë arrestuar në Mallorca, Menorca dhe Valencia.

Policia spanjolle ka kapur në Mallorca një bandë prej shtatë personash të cilëve u ngarkohen 150 vjedhje dhe grabitje të kryera në qytete të ndryshme të këtij ishulli.

Ata, që të gjithë shqiptarë të Kosovës, siç shkruan gazeta ”Mallorca Zeitung”, janë arrestuar në Mallorca, Menorca dhe Valencia.

Gjësendet e vjedhura që u janë gjetur dhe konfiskuar pjesëtarëve të bandës me rastin e arrestimit të tyre kanë qenë vetura luksoze, (si Porsche 911, BMWX5) ora markash të shtrenjta dhe para. Gjësendet janë nga grabitjet e bëra në Santa Ponça, Llucmajor etj., transmeton albinfo.ch. Ata kanë vjedhur para së gjithash në banesat luksoze në këto qytete.

Që të shtatë pjesëtarët e bandës ndodhen në paraburgim.

“Operation Grey Lion” siç është quajtur operacioni për kapjen e bandës, ka nisur që nga fillimi i vitit. Së pari policia kishte arrestuar dy pjesëtarë të bandës në prill të këtij viti në një banesë me qira në afërsi të Aeroportit të Pallma de Mallorca-s, transmeton albinfo.ch. Në gusht ishte kapur një tjetër pjesëtar dhe kështu me radhë. Ndërsa koka e bandës i cili banonte në Valencia është kapur në këtë qytet së bashku me dy vjedhës tjerë.

Gjësendet e vjedhura, hajdutët synonin t`i shisnin kryesisht në tregun e zi shqiptar.

---