Këshilli federal vendos për vazhdimin e masave kundër terrorizmit

Ai ka marrë vendimin që 70 vendet e punës në fushën e luftimit të terrorizmit, të cilat i pati hapur në vitin 2015 për tri vite, t`i vazhdojë me afat të pakufizuar

Keystone

Në mbledhjen e tij të mbajtur sot, më 12 prill, Këshilli Federal ka marrë vendimin që  70 vendet e punës në fushën e luftimit të terrorizmit, të cilat i pati hapur në vitin 2015 për tri vite, t`i vazhdojë me afat të pakufizuar, thuhet në një komunikatë shtypi të organeve federale. tëbotë Shërbimi Federal i Informimit (NDB) qe përforcuar me 29, Fedpol me 30, SEM me 8 dhe EDA me 3 punonjës.

Këshilli Federal në kuadrin e vlerësimit të përgjithshëm të burimeve njerëzore do të vendosë mbi marrjen e masave të mëtejshme.

Qeveria, në vitin 2015 e kishte marrë po ashtu një vendim për rritjen e shumës së zhdëmtimit për tri vite të zyrave të mbrojtjes së shtetit nëpër kantone, shkruan albinfo.ch. Edhe këtë vendim tash e lë të pakufizuar në kohë, duke e financuar me dy milionë franga.

Në klimën e sulmeve terroriste në Evropë nga viti 2015 dhe aktiviteteve terroriste në vazhdimësi të grupimeve xhihadiste, kërcënimi terrorist për shumë vende evropiane konsiderohet i shtuar. Duhet llogaritur me sulme të mëtejshme nga ky drejtim. Spektri i tyre shkon nga sulmet e thjeshta të individëve dhe grupimeve të vogla e deri te aksionet komplekse si për shembull ato që bëhen përmes “Shtetit Islamik”.