Këshilli Kombëtar Shqiptar: Shqiptarët po përjashtohen nga institucionet në Luginë

Ardita Sinani, FB

Këshilli Kombëtar Shqiptar (KKSh) në Luginën e Preshevës ka reaguar ndaj vendimit për emërimin e katër personave nga komuniteti serb, përfshirë një nga Vranja, në Administratën Tatimore të Bujanocit, një komunë ku shqiptarët përbëjnë rreth 63 për qind të popullsisë.

Kryetari i KKSh-së, Enkel Rexhepi, e ka quajtur këtë vendim shembull të qartë të diskriminimit dhe përjashtimit të shqiptarëve nga jeta publike dhe institucionale.

Ai theksoi se mospërfshirja e shqiptarëve në institucionet publike të nivelit qendror tregon se qeveria nuk po respekton Kushtetutën, ligjet dhe marrëveshjet e arritura, përfshirë Marrëveshjen e Konçulit, Planin me 7 pika të vitit 2013 dhe Planin e integrimit të shqiptarëve në sektorin publik për periudhën 2023-2026.

Rexhepi paralajmëroi se këtë çështje do ta paraqesë edhe para institucioneve dhe faktorëve ndërkombëtarë, duke e cilësuar si një rast të pastër diskriminimi ndaj shqiptarëve në Bujanoc.