Futboll

Kush ofron kaq milionë euro, mund ta marrë kartonin e yllit kosovar

Milot Rashica mund të shkojë diku tjetër vetëm nëse ofrohen rreth 30 milionë

Pasi mbeti në Bundesligë, Werder Bremeni i kërkon 25 deri në 30 milionë euro për kartonin e yllit kosovar, të cilin më së shumti e pëlqen Leipzigu.

Werder Bremeni është i gatshëm ta shesë Milot Rashicën.

Këtë e ka thënë edhe drejtori sportiv i klubit gjerman, Franck Baumann.

“Nëse një klub shpreh interesim specifik, do të ulemi dhe do ta gjejmë një zgjidhje”, kishte thënë ai.

Mirëpo, klubi gjerman tash është trimëruar, pasi e siguroi mbetjen në Bundesligë, shkruan tabloidi gjerman “Bild”.

Werderi i kërkon së paku 30 milionë euro për yllin kosovar, i cili ka kontratë me këtë klub deri në vitin 2022.

Interesimin më serioz për 24-vjeçarin e ka shfaqur Leipzigu, përcjell albinfo.ch

Mirëpo, ky klub shpresonte që Werderi do të binte nga liga dhe në këtë mënyrë do të mund ta blinte Rashicën për 15 milionë euro.

Leipzigu e sheh Rashicën si zëvendësues ideal të Timo Wernerit, të cilin e shiti së fundmi në Chelsea.

E tash gjërat janë komplikuar, pasi çmimi prej 30 milionë eurosh po duket i lartë nga klubet e interesuara për Rashicën.

Futbollistin vushtrrias në Gjermani e duan Leipzigu, Borussia Dortmundi e Hertha Berlini.

Në Itali, atë e pëlqejnë Milani, Lazio e Napoli.

Kurse, në Angli, interesim për futbollistin ofenziv kanë shprehur Liverpooli, Aston Villa, Wolverhamptoni, West Ham Unitedi e Brightoni.

Edhe vetë ish-futbollisti i Vushtrrisë dhe Vitesses e ka shprehur dëshirën për t’u larguar nga Werderi.

Ai i ka realizuar 11 gola këtë sezon me klubin gjerman, ku ishte protagonist në dy sezonet e fundit.