KMDLNJ kundër shkurtimit afatit për verifikimin e viktimave të dhunës seksuale

"Nëse flitet për një numër hipotetik përafërsisht 20.000 viktima të dhunës seksuale, koha prej pesë 5 muajve nuk do të mjaftonte as për evidentimin e shënimeve elementare personale"

Kërkesa e ministrit të Financave, Bedri Hamza, për shkurtimin e afatit për verifikimin e viktimave të dhunës seksuale nga 5 vjet në 5 muaj, sipas KMDLNJ-së është e papranueshme, jashtë çdo logjike dhe përpjekje që të dëmtojë drejtpërdrejt viktimat e dhunës seksuale.

“Duke marrë parasysh faktin se për verifikimin e drejtë të këtij procesi, që është jashtëzakonisht i komplikuar, duhen vite të tëra, siç është vepruar në shtetet që e kanë përjetuar këtë tragjedi njerëzore. Nëse flitet për një numër hipotetik përafërsisht 20.000 viktima të dhunës seksuale, koha prej pesë 5 muajve nuk do të mjaftonte as për evidentimin e shënimeve elementare personale, e lëre më të përfundojë procesi i verifikimit”, thuhet në reagim.

KMDLNJ thotë se plotësisht e kupton reagimin e shoqatave që merren me viktimat e dhunës seksuale për këtë ngushticë kohore nga pesë vjet në pesë muaj, është në anën e këtyre shoqatave, e sidomos është në anën e mbrojtjes së të drejtave për viktimat e dhunës seksuale, të cilat me këto pesë muaj skajshmërisht diskriminohen, deri te mundësia e realizimit të kësaj të drejte.