Konfiskohen 10 kilogram drogë, i përfshirë edhe një polic kosovar

Arrestimin e të dyshuarve e ka konfirmuar për mediat kosovare prokurorja e Prokurorisë në Mitrovicë, Zejnie Kela

Njësia Anti-Drogë e Policisë së Kosovës ka arrestuar mbrëmë në rajonin e Mitrovicës Veriore tre persona për posedim të lëndëve narkotike. Arrestimi i të dyshuarve ka ndodhur në fshatin Shupkovc të Mitrovicës, ndërsa siç raportojnë mediat lokale duke u thirrur në burimet e policisë, njëri nga të arrestuarit është polic kosovar nga Njësia e Mbrojtjes së Afërt.

Arrestimin e të dyshuarve e ka konfirmuar për mediat kosovare prokurorja e Prokurorisë në Mitrovicë, Zejnie Kela.

“Janë arrestuar 3 persona për narkotik. Tash jemi në fazën e hetimeve dhe nuk mund të them asgjë më shumë”, tha ajo.

Mediat në Kosovë kanë marrë vesh se në veturën “Audi” të cilën e drejtonte pjesëtari i Policisë së Kosovës është gjetur droga në sasi prej mbi 10 kilogramë. Ndërsa, dy të arrestuarit e tjerë ishin në një veturë tjetër, e cila e shoqëronte veturën e drejtuar nga zyrtari i Policisë. Tre të dyshuarit gjendeshin në dy vetura të ndryshme.