Kosova do t’i përmbushë obligimet ndaj drejtësisë

Presidentja Jahjaga e ka siguruar prokurorin e Task Forcës për Hetime Speciale, Clint Williamson, se Kosova merr përgjegjësi për t’i përmbushur obligimet ndaj drejtësisë

Institucionet e Kosovës janë të përkushtuara të bashkëpunojnë ngushtë me Task Forcës për Hetime Speciale (SITF), për të forcuar rendin dhe ligjin dhe për të përmbushur obligimet ndaj drejtësisë ndërkombëtare e vendore. Kështu deklaroi presidentja Atifete Jahjaga gjatë një takimi që zhvilloi me  prokurorin SIFT, Clint Williamson.

Prokurori amerikan Williamson, po viziton Kosovën në prag të shpalljes së të gjeturave hetimore nga raporti i Dick Martyt.

Ai falënderoi presidenten Jahjaga për përkrahjen e saj dhënë Task Forcës për Hetime Speciale.

“Kuvendi i Kosovës e ka mbështetur krijimin e Gjykatës Speciale dhe që në momentin e konsolidimit institucionet e sapozgjedhura do të zbatojnë marrëveshjen e ratifikuar duke bërë ndryshimet e domosdoshme ligjore dhe kushtetuese për të akomoduar krijimin e gjykatës së re”, deklaroi Jahjaga.

Presidentja kosovare tha se ajo është e përcaktuar që qasja e Kosovës ndaj drejtësisë të jetë gjithëpërfshirëse dhe se hetimet që dalin nga raporti i Këshillit të Evropës nuk janë përpjekje për të gjykuar betejën tonë kolektive për liri, por mënyrë për të hetuar krimet e supozuara individuale.

Jahjaga e siguroi prokurorin Williamson se Kosova është e përcaktuar që të ballafaqohet me këto akuza në një proces kredibil dhe do të përmbush obligimet e saj me përgjegjësi dhe dinjitet në mënyrë që të përmbyllë këtë kapitull që do të forcojë pozicionin ndërkombëtar të Kosovës.