Kosovë: Ndryshimi i tatimit për të ardhurat personale

Murati: Po përmbushim njërin nga premtimet

Administrata Tatimore e Kosovës ka njoftuar për hyrjen në fuqi të Ligjit Nr. 08/L-142 për ndryshimin dhe plotësimin e ligjeve që përcaktojnë shumën e beneficionit në lartësi të pagës minimale, procedurat e caktimit të pagës minimale dhe shkallët tatimore në të ardhurat personale vjetore.

Me hyrjen në fuqi të këtij ligji, ndryshohen edhe shkallët tatimore për të ardhurat personale.

Sipas ATK-së, për të ardhurat e tatueshme deri në tre mijë euro (3.000 €), duke përfshirë edhe shumën tre mijë euro (3.000 €), zero për qind (0%);

Për të ardhurat e tatueshme mbi tre mijë euro (3.000 €), deri në pesë mijë e katërqind (5.400 €), duke përfshirë edhe shumën pesë mijë e katërqind (5,400 €), tetë për qind (8%) të shumës mbi tre mijë euro (3.000 €); dhe
Për të ardhurat e tatueshme mbi pesë mijë e katërqind (5,400 €), plus dhjetë për qind (10%) të shumës mbi pesë mijë e katërqind (5,400 €)”.

E pas këtij njoftimi ka reaguar edhe ministri i Ekonomisë, Hekuran Murati.

Ai në një postim në Facebook thekson se me hyrjen në fuqi të Ligjit për pagën minimale, përfundimisht hapet rruga që edhe zyrtarisht të rritet paga minimale pas më shumë se një dekade.

“Një ndryshim tjetër me rëndësi, dhe njëkohësisht edhe përmbushje e njërit nga premtimet tona, është që paga minimale do të jetë e liruar nga tatimi. Pra, me ndryshimin e shkallëve tatimore, vlera e pagës që lirohet nga tatimi rritet në 250 euro (nga 80 sa ishte)”, tha Murati.

“Me fjalë tjera, të gjithë të punësuarit, qoftë në sektorin publik apo privat, do të paguajnë më pak tatim për shkak se rritet vlera e pagës që lirohet nga tatimi”, shkroi ai. 

 

---