KQZ-ja në Kosovë hap afatet për listat zgjedhore për zgjedhjet e 7 qershorit

Kosovë: KQZ-ja hap procesin e certifikimit dhe dorëzimit të listave për zgjedhjet e 7 qershorit

Në Kosovë, zëdhënësi i Komisionit Qendror të Zgjedhjeve, Valmir Elezi, ka bërë të ditur afatet për aplikimin dhe certifikimin e subjekteve politike, si dhe për dorëzimin e listave të kandidatëve për deputetë në kuadër të zgjedhjeve të parakohshme për Kuvendin e Kosovës, përcjell albinfo.ch.

Sipas tij, nga 2 deri më 10 maj 2026, subjektet e reja politike – përfshirë koalicionet, nismat qytetare dhe kandidatët e pavarur – duhet të dorëzojnë aplikimin për certifikim në Komisioni Qendror i Zgjedhjeve, përkatësisht në Zyrën për Regjistrim, Certifikim dhe Kontrollin Financiar. Ai ka sqaruar se, bazuar në Ligjin për Zgjedhjet e Përgjithshme, partitë politike konsiderohen automatikisht të certifikuara, ndërsa ky proces vlen vetëm për subjektet e reja politike.

Ndërkaq, KQZ ka caktuar periudhën nga 2 deri më 12 maj 2026 për dorëzimin e listave të kandidatëve për deputetë.

Ky afat 11-ditor vlen për të gjitha subjektet politike, përfshirë partitë, koalicionet, nismat qytetare dhe kandidatët e pavarur që synojnë pjesëmarrjen në zgjedhjet e parakohshme të 7 qershorit.

Dorëzimi i listave do të bëhet përmes platformës elektronike të KQZ-së, ndërsa procedurat mbeten të njëjta me ato të zbatuara në zgjedhjet e fundit të mbajtura në dhjetor të vitit të kaluar./Albinfo.ch

---