Kur politikani martohet me valltaren e klubit të natës

Shumica e politikanëve dhe analistëve thonë se kjo ka qenë zgjedhja e vetë Bäumle-së dhe nuk ka të bëjë me politikën

Kryetari i Partisë së Gjelbër Liberale të Zvicrës, Martin Bäumle është gjetur papritur nën “dritat e reflektorëve” të medieve zvicerane për një detaj të jetës së tij private. Gruaja e tij, Yuliya, një ukrainase e bukur, martesën me të cilën – të lidhur  javën e kaluar – Bäumle e ka mbajtur të fshehur nga opinioni, ka qenë valltare në një klub nate.

Dhe pikërisht në atë lokal ai është njohur me ukrainasen, të cilën pastaj e ka zgjedhur për grua.

Pasi gazetat e kanë zbuluar këtë pikanteri, Bäumle, kryetari 47 vjeçar i partisë më prosperuese të Zvicrës, ka pranuar të zbulojë hollësitë e reja rreth kësaj lidhjeje të pazakonshme.

Para martesës më 11 nëntor ai kishte udhëtuar në Ukrainë për t`i kryer formalitetet dhe pastaj e kishte sjellë Yulian si grua të veten në Zvicër.

Po të mos shpejtonte, gruas së tij do t`i rrezikohej qëndrimi në Zvicër, pasi që leja e saj si artiste do t`i skadonte pas shtatë muajsh qëndrimi.

Martesa me valltaren e klubit të striptizit ka ngjallur edhe reagime në opinion. Gazeta “Tages Anzeiger” ka ngritur çështjen nëse një gjë e tillë e dëmton ose jo karrierën e një politikani në Zvicër. Shumica e politikanëve të krahëve të ndryshëm, ashtu si dhe analistë politikë, thonë me këtë rast se kjo ka qenë zgjedhja e vetë Bäumle-së dhe nuk ka të bëjë me politikën.

Një përfundim të ndryshëm do të kishte një veprim i tillë, thekson gazeta, nëse do të ndodhte në SHBA. Atje lidhjet e ngjashme të politikanëve u kushtojnë atyre “me kokë” ose të paktën me një pauzë në karrierë.

Por edhe fakti se Bäumle është nga Cyrihu liberal dhe jo ta zëmë nga Valisi konservativ katolik, e favorizon atë, thonë analistët dhe politikanët për gazetën “Tages Anzeiger”.