Kurti: Afrim Bunjaku është vrarë në një sulm ndaj vetë shtetit tonë

Albin Kurti

Kryeministri i Kosovës, Albin Kurti, në mbledhjen komemorative që po zhvillohet në Prishtinë sot ka thënë se rreshteri Afrim Bunjaku është vrarë në një sulm ndaj vetë shtetit tonë, nga një grup personash të armatosur rëndë.

“Me veprimet profesionale dhe të guximshme të Policisë, dje e pamundësuam një skenar më të gjerë kriminal e terrorist. Afrim Bunjaku u vra gjatë një sulmi ndaj Policisë së Kosovës dhe ndaj vetë shtetit tonë nga një grup personash shumë të armatosur dhe të pajisur rëndë, të trajnuar profesionalisht dhe me plan, të financuar materialisht dhe të mbështetur nga Serbia. Reagimi profesional i Policisë sonë rezultoi me eliminimin e disa terroristëve e kriminelëve, arrestimin e disa të tjerëve dhe neutralizimin e gjithë grupit të tyre, si dhe konfiskimin e gjithë armatimeve dhe mjeteve të tjera logjistike”, ka thënë ai.

Kryeministri gjatë fjalimit të tij u shpreh se sot është dita kur duhet t’i bëhen nderimet më të larta shtetërore policit Afrim Bunjaku.