Kurti i kërkon Turqisë mbështetje për hapjen e linjës ajrore Kosovë–SHBA

Në takim me ministrin turk të Tregtisë Ömer Bolat u diskutua edhe për zgjerimin e Marrëveshjes së Tregtisë së Lirë dhe organizimin e Forumit Ekonomik në Prishtinë

Kryeministri i Kosovës, Albin Kurti, ka zhvilluar një takim me ministrin e Tregtisë të Republikës së Turqisë, Ömer Bolat, më 22 prill 2026, ku u diskutua për thellimin e bashkëpunimit ekonomik dhe tregtar ndërmjet dy vendeve, përcjell albinfo.ch.

Sipas njoftimit të Zyrës së Kryeministrit, Kurti vlerësoi marrëdhëniet e mira Kosovë–Turqi dhe e falënderoi ministrin Bolat për mbështetjen e vazhdueshme të Turqisë ndaj Kosovës në nivel bilateral dhe ndërkombëtar.

Në këtë takim, Kurti ka kërkuar ndihmën e Turqisë edhe për synimet e Kosovës për hapjen e një linje të re ajrore ndërmjet Kosovës dhe Shteteve të Bashkuara të Amerikës, e cila sipas tij do të shërbente për ndërlidhje më të madhe globale dhe ekonomike.

Në komunikatë thuhet gjithashtu se kryeministri theksoi se gjatë dekadës së fundit janë dyfishuar shkëmbimet tregtare ndërmjet Kosovës dhe Turqisë, me rritje të theksuar pas hyrjes në fuqi të Marrëveshjes për Tregti të Lirë.

Palët diskutuan edhe për mundësinë e zgjerimit të kësaj marrëveshjeje duke përfshirë shërbimet, si ato profesionale, teknologjia e informacionit, transporti, logjistika dhe shërbimet financiare. Kurti përmendi potencialin e Kosovës për eksport të shërbimeve, duke kërkuar që bashkëpunimi të konkretizohet më tej.

Po ashtu, Kurti u shpreh i gatshëm që Forumi i dytë Ekonomik Kosovë–Turqi, pas atij të mbajtur në Stamboll më 2024, të organizohet këtë vit në Prishtinë, si hap konkret për forcimin e bashkëpunimit ekonomik.

Në takim u diskutua edhe për aktivizimin e Komitetit të Përbashkët Ekonomik dhe Tregtar, ndërsa Kurti theksoi rëndësinë e bashkëpunimit në fushën e sigurisë dhe mbrojtjes, duke shprehur mirënjohje ndaj presidentit turk Recep Tayyip Erdoğan për mbështetjen ndaj Kosovës.

Ministri Bolat u takua gjithashtu edhe me ministren e Tregtisë, Mimoza Kusari-Lila, me të cilën zhvilluan një takim të përbashkët me biznese turke dhe kosovare, ku u diskutua për rritjen e eksportit, krijimin e lidhjeve të reja tregtare dhe lehtësimin e qasjes në treg.

Kusari-Lila theksoi se takim kishte për qëllim që bizneset të njihen më mirë, të shkëmbejnë përvoja dhe të hapin mundësi të reja bashkëpunimi, ndërsa rol të rëndësishëm iu dha edhe diasporës shqiptare në Turqi në lidhjen e bizneseve dhe forcimin e ekonomisë së Kosovës./Albinfo.ch

---