Kurti kërkon konsensus për dialogun me Serbinë

“Ekonomia e Kosovës është shkatërruar si pasojë e Serbisë, si nga lufta, por edhe mbas luftës”, kështu ka thënë kreu i Lëvizjes Vetëvendosje, Albin Kurti, në një konferencë për medie, në të cilën ka folur për kërkesat ndaj Serbisë, për të cilat subjektet politike mund të bëhen bashkë në Kuvend për konsensus për përpilimin e një liste, ku Serbisë i kërkohet njohja e pavarësisë si dhe zbulimi i personave të pagjetur në Kosovë, shkruan Albinfo.ch

Kurti ka thënë se ky do të duhej të ishte hapi i parë i përgatitjes për bisedime me Serbinë.  “Nuk mund të pajtohemi me Serbinë nëse nuk pajtohemi me njëri-tjetrin rreth këtij raporti”, ka thënë Kurti.

Ai është shprehur optimist, duke thënë se partitë politike mund ta ndërtojnë konsensusin parlamentar dhe qeveritar për kërkesat ndaj Serbisë.

Kurti përmendi të gjitha dëmet që, sipas tij, Serbia ia ka shkaktuar Kosovës, duke thënë se ajo po vazhdon ende të shkaktojë dëme të pariparueshme.