Kurti pyetet nga mediat greke për bashkimin kombëtar, ja si përgjigjet

Kryeministri i Kosovës, Albin Kurti ka dhënë një intervistë për median greke “To Vima”, ku është pyetur nëse e përkrah bashkimin e Kosovës me Shqipërinë.

Kurti u përgjigj duke thënë se Kosova dhe Shqipëria janë një komb dhe dy shtete.

“Shqiptarët në Kosovë përbëjnë 93%. Ne jemi një komb, por dy shtete. Kam fituar pushtetin në shkurt të 2021-shit duke premtuar punë dhe drejtësi dhe këto mbeten prioriteti im. Ne kemi marrëdhënie të shkëlqyera me Shqipërinë. Mendoj se shumica e akuzave ndaj meje, në lidhje me bashkimin, vijnë nga serbët, sepse ata duan që Republika Srpska (Bosnja) të bashkohet me Serbinë. Ata kanë shpikur të ashtuquajturën ‘Bota Serbe’ si një eufemizëm për Serbinë e Madhe”, tha Kurti.

Megjithatë atij iu bë edhe një pyetje rreth kësaj teme, nëse ai e dëshiron bashkimin me Shqipërinë.

“Për momentin Kushtetuta e Kosovës nuk e lejon këtë dhe ne jemi të fokusuar në mbrojtjen e vendit tonë, integritetit territorial dhe sovranitetit të tij. Por e përsëris se ne kemi marrëdhënie të shkëlqyera me Shqipërinë dhe, megjithëse jemi një komb, jemi dy shtete të ndryshme”, u përgjigj Kurti.

 

---